Dec. 9, 2016

Setti saman smá slæðusýningu af barnabörnum okkar Dísu.  Eins og hér má sjá erum við mjög rík en þessar myndir eru teknar á þessu ári.

 

Dec. 3, 2016

Við hjónin eigum barnaláni að fagna.  Eignumst fjögur falleg, heilbrigð og vel gerð börn, tvo stráka og tvær stelpur.  Síðasta árið hefur sonur okkar með tvö barnunga drengi dvalið á heimilinu eftir að hann missti konu sína á sviplegan hátt í janúar s.l.  Auðvitað hefur þetta sett annan og líflegri brag á heimilishaldið og alveg óvænt erum við orðin virkir þátttakendur í uppeldi þessara gullmola.   

Tvær dætra okkar búa úti á landi.  Það er alltaf tilhlökkun í loftinu þegar von er á fjölskyldum þeirra í heimsókn.  Að gömlum og góðum sið hýsum þær og það er mikið fjör þegar barnabörnin koma.  

Það er ekki oft sem öll stórfjölskyldan kemur saman undir eitt þak.  Þó er það svo um þessa helgi og öll rúm fullnýtt auk þess sem sumir sofa á stofugólfinu.  Vissulega þurfa allir sitt pláss og sumir meira en aðrir og sumum liggur hærra rómur en öðrum.  Svoleiðis er það bara. Auðvitað er þetta gaman en það reynir stundum á gamla skrokka sem gjarnan kunna betur að meta kyrrðina og rólegheitin þegar afleggjarnir hafa verið kvaddir og það verður hljótt í húsinu.  

Þá getur maður farið að hlakka til næstu heimsóknar.

Dec. 2, 2016

Nú þegar skammdegið verður hvað myrkast verða tækifærin til að setjast við tölvuna gera það sem búið er að standa lengi til.   Eitt af því sem beðið hefur í "dankinum" er að búa til heimasíðu þar sem eigandinn getur látið móðan mása um hugðarefni sín, um ökukennsluna, ljósmyndunina, þjóðfélagsmál og hvað eina sem honum dettur í hug.

Hér verður að finna samantekt og fróðleik fyrir ökunemana mína, æfingaverkefni o.fl. Gott og gagnlegt að hafa þetta allt á sama stað.

Eitthvað verður hér sett inn af ljósmyndum.  Hafa ber í huga að allar eru þær háðar höfundarrétti (c) en velkomið að hafa samband girnist einhver þær.

Svo er það gestabókin sem öllum er velkomið að skilja eftir fyrirspurnir, álit eða bara kveðjur.